आठ अर्ब ३० करोड संस्थागत निक्षेप लगानीको आह्वान

आठ अर्ब ३० करोड संस्थागत निक्षेप लगानीको आह्वान

काठमाडौं, मंसिर २२
नेपाल राष्ट्र बैंकले बैंकिङ प्रणालीमा पुनः आठ अर्ब ३० करोड रुपैयाँ संस्थागत निक्षेप राख्ने भएको छ । राष्ट्र बैंकका अनुसार एक वर्षीय मुद्दती निक्षेपको रुपमा २०७६ पुस १ गतेदेखि वि.सं. २०७७ मंसिर ३० गतेसम्मको लागि उक्त परिमाणमा रकम राख्न लागिएको हो । बैंकको उपदान तथा पेन्सन कोष तथा कर्मचारी सुरक्षण कोषमा रहेको रकम बैंकिङ प्रणालीमा राख्न लागिएको राष्ट्र बैंकले जनाएको छ । 

यसरी मुद्दती निक्षेपको रुपमा राखिने कुल रकममध्ये वाणिज्य बैंकहरुको लागि छ अर्ब ६४ करोड, क्षेत्रीय तथा राष्ट्रियस्तरका विकास बैंकहरुको लागि एक अर्ब २४ करोड ५० लाख र फाइनान्स कम्पनीहरुको लागि ४१ करोड ५० लाख रुपैयाँ छुट्याएको छ । राष्ट्र बैंकका अनुसार रकम लगानी गर्न चाहने इच्छुक तथा फाइनान्स कम्पनीहरुले यही मंसिर २३ गते अपराह्न ३ बजेसम्म नेपाल राष्ट्र बैंकमा आफूले लगानी गर्न चाहेको रकम र उक्त रकममा दिन चाहेको ब्याज समेत उल्लेख गरेर आवेदन दिनुपर्नेछ ।

 रकम लगानीको लागि प्रस्ताव पेस गर्ने बैंक तथा फाइनान्स कम्पनीहरु सञ्चालनमा आएको कम्तीमा दुई वर्ष पूरा गरेको, तोकिएको न्यूनतम पुँजीकोष कायम रहेको, निष्क्रिय कर्जा (एनपीए) कुल कर्जा सापटको पाँच प्रतिशतभन्दा कम भएको खुद तरल सम्पत्ति स्वदेशी निक्षेपको कम्तीमा २० प्रतिशत वा सोभन्दा बढी रहेको हुनुपर्ने प्रावधानहरु तोकिएका छन् । 

 

यसैगरी कर्जा तथा स्वदेशी निक्षेप र प्राथमिक पुँजी अनुपात यस बैंकले निर्धारण गरेको सीमाभित्र रहेको, सर्वसाधारणको लागि छुट्याइएको सेयर जारी गरिसकेको, निकटतम अघिल्लो आवमा सञ्चालन मुनाफा (व्यवस्थापछि) मा रहेको, लगानी गरिने बैंकको कुनै पनि सञ्चालक, प्रमुख कार्यकारी अधिकृत वा कार्यकारी सञ्चालकलाई राष्ट्र बैंकले जरिवाना गरेको अवस्थामा त्यस्तो जरिवाना गरिएका सञ्चालक, प्रमुख कार्यकारी अधिकृत वा कार्यकारी सञ्चालक बैंकमा नरहेको, शीघ्र सुधारात्मक कारबाहीमा परेको भए फुकुवा भएको कम्तीमा छ महिना पूरा भएको, लगानी गरिने बैंक नेपाल राष्ट्र बैंक ऐन, २०५८ को दफा ८६ बमोजिमको कारबाहीमा परी समस्याग्रस्त घोषणा नभएको तथा समस्याग्रस्त घोषणा भएकोमा सो फुकुवा भएको छ महिना अवधि पूरा भएको एवं रियल स्टेट कर्जा बैंकबाट तोकिएको सीमाभन्दा बढी नभएको हुुनुपर्ने प्रावधानहरु तोकिएका छन् । (आर्थिक दैनिकबाट)

प्रतिकृया दिनुहोस