टी २० क्रिकेट: लगातार दोस्रो खेलमा नेपाल पराजित

टी २० क्रिकेट: लगातार दोस्रो खेलमा नेपाल पराजित

काठमाण्डौँ,फागुन १८

एशिया इस्टर्न रीजन टी २० क्रिकेट प्रतियोगिता अन्तर्गत हङ्‍कङविरुद्धको खेलमा नेपाल पराजित हुन पुगेको छ।हङ्‍कङले दिएको १५५ रनको चुनौती पछ्याउने क्रममा नेपालका ब्याट्सम्यानहरू एकपछि अर्को गर्दै पवेलियन फर्किएपछि नेपालले हार बेहोरेको हो।

नेपालले सबै खेलाडी गुमाउने क्रममा १८. १ ओभरमा १११ रन मात्र बनाउन सक्यो।

पहिलो दिनको खेलमा नेपाल मलेसियासँग २२ रनले पराजित भएको थियो।।

यो सँगै नेपालको प्रतियोगितामा अगाडि बढ्ने सम्भावना निकै न्यून बनेको छ।

एशिया कपको छनोटको रुपमा रहेको जारी प्रतियोगितामा शीर्ष दुई टोली मात्र छनोट हुनेछन्।

खराब ब्याटिङ

युवा खेलाडी कुशल मल्ललाई पुन: प्रारम्भिक ब्याट्सम्यानको जिम्मा दिइएको खेलमा नेपालको मध्यक्रम फेरी एकपटक असफल सावित हुन पुग्यो।

कुशल १९ रन बनाएर आउट भएपछि आएका ब्याट्सम्यानहरु एकपछि अर्को गर्दै आउट हुन पुगे।

पारस खड्का ४, दीपेन्द्र सिंह ऐरी ५, विनोद भण्डारी ५, पवन सर्राफ १ रनमा खुम्चिएपछि नेपाल हारतर्फ अग्रसर भएको थियो।

क्रिकेटतस्वीर कपीराइटACC

कप्तान मल्लले एउटा इन्डबाट खेल सम्हाल्ने प्रयास गरिरहँदा उनलाई सहकर्मी ब्याट्सम्यानहरुले राम्रो साथ दिन सकेनन्।

फलत: १६ औं ओभरमा मल्ल पनि स्टम्पिङको सिकार हुन पुगे। दोस्रो पटक अर्धशतक बनाउनबाट चुकेका उनले ४६ रन बनाउने क्रममा चार चौका र एक छक्का प्रहार गरेका थिए।

आरिफ शेखले केही समय सङ्घर्ष गर्दे १० रन जोडेका थिए।

उनीपछि आएका अलराउन्डर करण केसीले खेलमा केही आशा थप्न खोजेका थिए। एउटा विशाल छक्का प्रहार गरेपनि फेरी त्यस्तै शट् प्रहार गर्ने क्रममा उनी पनि ७ रनमा आउट हुन पुगे।

अन्तिम ब्याट्सम्यान अविनाश बोहराले १२ रन बनाए।

लक्ष्य

थाईल्यान्डको टेर्डथाइ किक्रेट मैदान भएको आफ्नो दोस्रो खेलमा नेपालले हङ्‍कङबाट १५५ रनको चुनौती पाएको छ।

२० ओभर ब्याटिङ गर्ने क्रममा हङ्‍कङले ६ विकेट गुमाएर १५४ रन बनाएको थियो।

नेपाल क्रिकेटतस्वीर कपीराइटCAN

नेपालका लागि स्पीनर सन्दीप लामिछाने र युवा बलर सुशन भारीले दुई-दुई र कुशल मल्लले एक विकेट लिएका थिए।

हङ्‍कङका एक ब्याट्सम्यान रन आउट भएका थिए।

यसअघि आफ्नो पहिलो खेलमा शनिवार नेपाल मलेशियाबाट २२ रनले पराजित भएको थियो।

एशिया कपको छनौट प्रतियोगिता

यो प्रतियोगितामा थाइल्यान्ड, मलेसिया, सिङ्गापुर र हङ्‍कङ समावेश छन्।

सबै सहभागी राष्ट्रले एकअर्का विरुद्ध खेलेपछि शीर्ष दुई स्थानमा रहने टोलीले अगस्टमा कुवेत र यूएईसँग खेल्नेछ।

मलेशियामा हुने सो प्रतियोगिताबाट सेप्टेम्बरमा पाकिस्तानमा हुने टी२० एशिया कप खेल्ने देश छनौट हुनेछ।

एशिया कपमा भारत, श्रीलङ्का, बाङ्ग्लादेश र अफगानिस्तान पनि सहभागी हुनेछन्।(वीवीसी नेपाली सेवा बाट )

प्रतिकृया दिनुहोस



विविध

Techie